काठमाडौं, १९ पुस । नेकपा एमालेका केन्द्रीय सदस्य सूर्य प्रसाद ढकालले एमालेले राष्ट्रिय सभा निर्वाचनमा सबै सिटमा उम्मेदवारी दिने बताउनुभएको छ ।
उहाँले राजनीतिक र साँगठानिक हिसाबले एमाले प्रमुख र शक्तिशाली पार्टी भएकाले राष्ट्रिय सभा निर्वाचनमा खालि सबै सिटमा उम्मेदवारी दिने बताउनु भएको हो । रेडियो काठमान्डुको कार्यक्रम राईट कर्नरमा बोल्दै नेता ढकालले पार्टीलाई सहयोग गर्ने अन्य दललाई सँगै लगेर जाने नभए एक्लै भए पनि निर्वाचनमा जाने बताउनुभयो ।
उहाँले मुलुकलाई निकास दिन, यो व्यवस्थालाई असफल हुन नदिन र सामाजिक सद्भाव खलबलिन नदिनका लागि एमाले सत्तामा रहेका दलहरू सँग छलफल गर्नुलाई स्वाभाविक ठान्नु पर्ने बताउनुभयो । उहाँले अहिले गठबन्धन सँग एमाले सत्ता सौँदाबाजि गर्ने पक्षमा नरहेको बताउनुभयो ।
नेता ढकालले गठबन्धन सँग कुनै हिस्सा नमागेको दाबी गर्नुभयो । उहाँले एमालेले टिआरसि विधेयकसँग सिट साटेको भन्दै एमालेको छविलाई कमजोर बनाउन लागिएको बताउनुभयो ।
