काठमाडौं, १७ असोज । डेङ्गी परीक्षणका लागि किट अभाव नभएको स्वास्थ्य तथा जनसङ्ख्या मन्त्रालयले दाबी गरेको छ ।
समुदायस्तरमै डेङ्गी फैलिएपछि यसको परीक्षण गर्न आवश्यक किट पनि समुदायस्तरमै उपलब्ध रहेकाले स्थानीय तहमार्फत डेङ्गी परीक्षण गर्न सकिने मन्त्रालयको भनाइ छ ।
डेङ्गी परीक्षण गर्दै आएको राष्ट्रिय जनस्वास्थ्य प्रयोगशाला दसैँ बिदा परेर बन्द गरिएपछि सर्वसाधारण नागरिक भने असन्तुष्ट छन् ।
दसैँ बिदाको समयमा हिजोदेखि आउँदो शुक्रवारसम्म प्रयोगशालामा डेङ्गी परीक्षण बन्द गरिएको हो ।
स्वास्थ्य तथा जनसङ्ख्या मन्त्रालयका सहप्रवक्ता डा. समिर कुमार अधिकारीले स्थानीयस्तरमा नै परीक्षणको व्यवस्था मिलाइएकाले नागरिकको सेवा प्रवाहमा असर नपर्ने दाबी गर्नुभयो ।
हाल देशका ७६ जिल्लामा गरी ३० हजारभन्दा बढीमा डेङ्गी सङ्क्रमण फैलिसकेको छ भने ३९ जनाको मृत्यु भइसकेको छ ।
