काठमाडौं, असार २५ । एक साताभित्र बिमा कम्पनीलाई भोटेकोशी नदीको बाढीबाट भएको क्षतिको विवरण बुझाउन नेपाल बिमा प्राधिकरणले निर्देशन दिएको छ। मंगलबार बिहान भोटेकोशी नदीमा आएको बाढीबाट भएको क्षतिको विवरण एक साताभित्र (आगामी बुधबार) प्राधिकरणमा बुझाउन बिमा कम्पनीलाई निर्देशन दिएको हो।
भोटेकोशी नदीमा आएको भिषण बाढीले रसुवामा जनधन र पूर्वाधारमा ठूलो क्षति पुर्याएको छ। बाढीबाट सडक अवरुद्ध, सवारी साधन बगाउने, कन्टेनर डिपो क्षतिग्रस्त हुने र केही हाइड्रोपावर आयोजना पूर्ण रूपमा बन्द भएका छन्। यी सबै सम्पत्तिको क्षति विवरण छिट्टै बुझाउन बिमा कम्पनीहरूलाई प्राधिकरणले निर्देशन दिएको छ।
नेपाल प्रहरीका अनुसार भोटेकोशी बाढीले २३ वटा कन्टेनर डब्बा, ६ वटा मालवाहक ट्रक र ३५ युनिट नयाँ विद्युतीय सवारी साधन (इभी) बगाएको तथ्यांक छ। यसबाहेक तीन वटा जलविद्युत आयोजना बन्द भएका छन्।
बिमा प्राधिकरणका अनुसार प्राकृतिक प्रकोपबाट भएको क्षति बिमा पोलिसीको प्रकार र कभरेज सर्तअनुसार आंशिक वा पूर्ण रूपमा कभरेजमा पर्ने छ। त्यसैले प्राधिकरणले सम्बन्धित बिमा कम्पनीहरूलाई दाबी प्रक्रियालाई छिटोछरितो बनाई पारदर्शिता कायम गर्न पनि निर्देशन दिएको छ।
