काठमाडौँ । प्रमुख प्रतिपक्षी दल नेपाली कांग्रेसले अर्थमन्त्री डा.स्वर्णिम वाग्ले र राष्ट्रिय स्वतन्त्र पार्टी (रास्वपा) का सभापति रवि लामिछानेमाथि गम्भीर प्रश्न गरेको छ ।
प्रतिनिधिसभा बैठकमा विशेष समय दिएर बोल्दै कांग्रेस संसदीय दलका नेता भीष्मराज आङदेम्बेले अर्थमन्त्री डा.वाग्लेबारे गम्भीर प्रश्न उठे पनि त्यस्तो प्रश्नबारे सरकार किन मौन भन्दै प्रश्न गरेका छन् । बुधबारको बैठकमा आङ्देम्बेले भने, ‘हिजो मन्त्रीको बारे प्रश्न उठ्दा सबै आगो, आज अर्थमन्त्रीको बारे गम्भीर प्रश्न उठ्यो । सबै बरफ किन ?।’
रास्वपा सभापति लामिछानेलाई पनि आङदेम्बेले भारतको राजधानी दिल्लीमा हुँदा सिमानाको र कालापनीको ‘क’ उच्चारण किन गरिएन भनेर प्रश्न गरे ।
आङ्देम्बेले लामिछानेले भारत भ्रमणको क्रममा सिमानाको विषयमा छलफल नगरेको भन्दै आपत्ति पनि जनाए । उनले लामिछानेले सिमानाको विषय ढोल बजाएर छलफल गर्ने विषय नभएको भनेर दिएको अभिव्यक्तिप्रति आपत्ति जनाउँदै भने, ‘दिल्लीमा हुँदा सिमानाको स र कालापानीको क उच्चारण नगरी किन फर्किनुभयो । हामीलाई पनि थाहा छ ढोल बजाएर हुँदैन । यसका केही मापदण्ड छन् ।’
सत्तारुढ दलको सभापतिले गर्नुपर्ने पहल पनि लामिछानेबाट नभएको उनको भनाइ थियो ।
