काठमाडौं : आगामी मंसिर १८ र १९ गते रोल्पाको लिबाङमा हुने ‘३० औँ राष्ट्रिय बालसाहित्य सम्मेलन–२०८२’ का तयारीहरू अन्तिम चरणमा पुगेका छन्।
सम्मेलनलाई भव्य, सभ्य र व्यवस्थित रूपमा सम्पन्न गर्न सरोकारवाला निकायहरूसँग समन्वयात्मक बैठक शनिबार लिबाङमा सम्पन्न भएको हो।
स्थानीय मूल आयोजक समितिका संयोजक डी.बी. टुहुरोको अध्यक्षतामा बसेको बैठकमा विभिन्न संघ–संस्था तथा निकायहरूले गर्नसक्ने सहयोगबारे विस्तृत छलफल गरिएको थियो। लिबाङ तथा आसपासका आमा समूह, टोल विकास समिति, विद्यालयलगायतका स्थानीय समूहहरूले झाँकीसहित सक्रिय सहभागिता जनाउने प्रतिबद्धता व्यक्त गरेका छन्।
यसअघि होटल व्यवसायी संघ तथा स्थानीय व्यवसायीहरूले पनि आवश्यक सहयोग गर्ने आश्वासन दिएका थिए।
आयोजक समितिले रोल्पाका दशैँ स्थानीय तहमा पुगेर कार्यक्षेत्र विभाजनसहित समन्वय कार्य अघि बढाइसकेको छ। सबै पालिकाबाट सकारात्मक प्रतिक्रिया प्राप्त भएको संयोजक टुहुरोले जानकारी दिए।
सह–संयोजक नवीन लोचन मगरका अनुसार बालसाहित्य सम्मेलन रोल्पामा पहिलोपटक आयोजना हुँदैछ र यसलाई जिल्लाले अवसर तथा सम्पत्तिको रूपमा ग्रहण गर्दै भव्यतापूर्वक सम्पन्न गर्ने तयारी छ। सम्मेलनमा नेपालसँगै भारत, चीन, बंगलादेशका लेखक तथा साहित्यकारहरूको सहभागिता रहने छ।
दुईदिने सम्मेलनमा विभिन्न दस साहित्यिक विधामा प्रशिक्षण सञ्चालन गरिने बताइएको छ। ती प्रशिक्षणमा रोल्पाका सबै स्थानीय तहका विद्यार्थीहरू सहभागी हुनेछन्। सदस्य–सचिव कविता उपाध्यायका अनुसार प्रशिक्षण व्यवस्थापनका तयारीहरू पूरा हुँदैछन्।
सम्मेलनको उद्घाटन निवर्तमान संघीय सांसद तथा पूर्व अर्थमन्त्री वर्षमान पुनले गर्ने कार्यक्रम रहेको छ।
कार्यक्रमअन्तर्गत तीनवटा कार्यपत्र प्रस्तुत हुने तथा चार विषयमा विषयविज्ञहरूको ‘प्यानल बहस’ समेत आयोजना गरिने नेपाल बालसाहित्य समाजका अध्यक्ष विजय आचार्यले जानकारी दिए।
सम्मेलनलाई सफल र भव्य बनाउन संयोजक डी.बी. टुहुरोले सबै पक्षसँग सहयोग र साथ दिन आग्रह गरेका छन्।
