काठमाडौं, असार १८ : सामाजिक सञ्जालमा ‘नेपाली ब्रो’ भनेर चिनिने कुमार थापाविरुद्ध श्रीमती ईश्वरी भुजेलको हत्या आरोपमा काठमाडौं जिल्ला अदालतमा मुद्दा दर्ता भएको छ।
प्रहरी अनुसन्धानपछि थापासहित उनकी प्रेमिका प्रतीक्षा आचार्य, उनका भाइ विक्रम थापा मगर र साथी पुजन थापा क्षेत्रीविरुद्ध पनि फरक–फरक अभियोगमा मुद्दा दर्ता गरिएको छ। अदालतमा उनीहरूको थुनछेक बहस जारी छ।
अदालतमा दिएको बयानमा कुमार थापाले लामो समयदेखि वैवाहिक सम्बन्धमा तनाव, पारिवारिक विवाद र विवाहेत्तर सम्बन्धका कारण आफू र श्रीमतीबीच मनमुटाव बढ्दै गएको बताएका छन्।
प्रहरीका अनुसार घटनाको दिन अदालतको काम सकेपछि घर पुगेका थापाले साँझ श्रीमतीसँग सडकमा भेट भएपछि पछ्याएर धारिलो हतियार प्रयोग गरी हत्या गरेको बयान दिएका छन्। घटनापछि उनले प्रयोग गरिएको हतियार फालेको र त्यसपछि पक्राउ परेको प्रहरी अनुसन्धानमा उल्लेख छ।
प्रहरीको दाबीअनुसार यो घटना लामो समयदेखिको पारिवारिक विवाद, वैवाहिक सम्बन्धमा आएको तनाव तथा विवाहेत्तर सम्बन्धसँग जोडिएको देखिएको छ। अदालतले अब प्रस्तुत प्रमाण, बयान र कानुनी प्रक्रियाका आधारमा अन्तिम निर्णय गर्नेछ।
यस घटनाको थप सुनुवाइ काठमाडौं जिल्ला अदालतमा जारी रहेको छ।
