काठमाडौं। नेपालमा आधिकारिक रुपमा सामाजिक सन्जाल टिकटक दर्ता भएको छ। सञ्चार तथा सूचना प्रविधि मन्त्रालयका अनुसार नेपालमा टिकटक आधिकारिक रूपमा दर्ता भएको हो।
सामाजिक सन्जाल व्यवस्थित गर्ने निर्देशिकाबमोजिम टिकटक दर्ता भएको हो। यसले नेपालको पर्यटन प्रवर्द्धनमा सहयोग पुग्ने सामग्रीमा सहयोग गर्ने, डिजिटल साक्षरताका विषयमा सहयोगलगायत नेपाल सरकारले तोकेका सर्त पूरा गर्नेछ।
सरकारले गत वर्ष फेसबुक, टिकटकजस्ता सामाजिक सन्जाल सूचीकृत नगरे बन्द गर्ने निर्देशिका मन्त्रिपरिषदबाट पारित गरेको थियो। सोहीअनुसार सूचना जारी गरेको तीन महिनाभित्र सूचीकृत हुनुपर्ने व्यवस्था गरेको थियो।
सरकारले २०८० कात्तिक २७ मा नेपालमा टिकटक बन्द गर्ने निर्णय गरे पनि गत भदौ ६ मा प्रतिबन्ध फुकाएको थियो। आधिकारिक रूपमा दर्ता भएसँगै सरकारले टिकटकबाट राजस्व उठाउने बाटो खुलेको छ भने नियमन पनि सहज हुनेछ।
