काठमाडौँ। राष्ट्रिय स्वतन्त्र पार्टी (रास्वपा) र विवेकशील साझा पार्टीबीचको एकता औपचारिक रूपमा सम्पन्न भएको छ। काठमाडौँमा आयोजित एकता घोषणा सभामा दुवै दलका शीर्ष नेताहरूले पाँच बुँदे एकीकरण सहमतिमा हस्ताक्षर गर्दै दुई दल अब एक संयन्त्रमा अघि बढ्ने घोषणा गरेका हुन्।
रास्वपातर्फबाट कार्यबाहक सभापति डोलप्रसाद अर्याल र डा. स्वर्णिम वाग्लेले हस्ताक्षर गरेका छन् भने विवेकशील साझा पार्टीतर्फबाट अध्यक्ष समीक्षा बाँस्कोटा र उपाध्यक्ष प्रकाशचन्द्र परियारले सहमतिमा हस्ताक्षर गरेका हुन्।
पाँच बुँदे सहमतिको मुख्य अंश
१. वैकल्पिक राजनीतिको इतिहासको मान्यता
दुवै दलले स्व। उज्वल थापा तथा ‘विवेकशील अभियान’ले वैकल्पिक राजनीतिमा पुर्याएको योगदानलाई दस्तावेजीकृत गर्दै संस्थागत मान्यता दिने सहमति गरेका छन्।
२. विशेष संयन्त्र संघीय नेतृत्व मञ्च
महाधिवेशनसम्मका लागि गठन हुने ‘विशेष संयन्त्र संघीय नेतृत्व मञ्च’ मा विवेकशील साझाबाट आएका नेताहरूलाई आपसी समझदारीका आधारमा मनोनयन गर्ने सहमति भएको छ। मञ्चका सदस्यहरूको वरियतालाई केन्द्रीय समिति सदस्य सरह मानिनेछ।
३ .संरचनात्मक समायोजन
विवेकशील साझाका सदस्य तथा सल्लाहकारहरूलाई केन्द्रीय, प्रादेशिक र स्थानीय तहका संरचनामा समायोजन गर्दा योग्यता, समावेशिता र सार्वजनिक छविलाई प्रमुख आधार मानिनेछ।
४. दलको नाम, झण्डा र चिन्ह यथावत
एकीकरणपछि दलको नाम ‘राष्ट्रिय स्वतन्त्र पार्टी’ नै रहनेछ।
दलको झण्डा—निलो पृष्ठभूमि, बीचमा सेतो गोलो आकृति र त्यसैभित्र निलो घण्टी—पहिलेझैँ रहनेछ।
दलको चुनाव चिन्ह पनि ‘घण्टी’ नै कायम रहनेछ।
५. कानुनी प्रक्रिया र सम्पत्ति व्यवस्थापन
एकीकरणपछि निर्वाचन आयोगमा पेस गर्नुपर्ने सबै कानुनी प्रक्रिया र दुवै पार्टीका नाममा रहेका चल–अचल सम्पत्ति व्यवस्थापन शीघ्र रुपमा आपसी सहमतिमा सम्पन्न गरिनेछ।
घोषणा सभामार्फत रास्वपाले आफ्नो सिद्धान्त, नेतृत्व र चुनाव चिन्ह ‘घण्टी’ को अभियानमा एकताबद्ध भई लोकतान्त्रिक सुशासन तथा समुन्नतिको मुद्दा अघि सार्न अन्य सुसंस्कृत, परिवर्तनकामी वैकल्पिक राजनीतिक शक्ति, समूह तथा व्यक्तिहरूलाई पनि खुलेर आव्हान गरेको छ।
