काठमाण्डौं, १४ मंसिर । मदन भण्डारी राजमार्गको सिन्धुली जिल्लाको दुधौली नगरपालिका–२ गागनमा आइतबार बिहान यात्रुवाहक बस र मोटरसाइकल एकआपसमा ठोक्किँदा एक जनाको मृत्यु भएको छ ।
पोखराबाट कटारीतर्फ गइरहेको बस र डकाहाबाट झुगातर्फ आइरहेको मोटरसाइकल एकापसमा ठोक्किँदा मोटरसाइकल चालक दुधौली नगरपालिका–३ का २५ वर्षीय महेश कुमरको मृत्यु भएको जिल्ला प्रहरी कार्यालयका प्रहरी नायब उपरीक्षक सूर्यप्रकाश सवेदीले जानकारी दिए ।
दुर्घटनामा कमलामाई नगरपालिका–१४ चन्दनपुरका २५ वर्षका दिपेश कुमर गम्भीर घाइते भएका छन् । उनको दुधौली नगर अस्पतालमा उपचार भइरहेको छ।
फरार रहेका बस चालक उदयपुरको कटारी नगरपालिका–३ का श्यामकुमार भट्टराईको खोजी जारी रहेको प्रहरीले जानकारी दिएको छ।
