काठमाडौँ। कर्णाली याक्सविरुद्ध पाँच विकेटको प्रभावशाली जितसँगै काठमाडौँ गोर्खाज नेपाल प्रिमियर लिग ९एनपीएल०को प्लेअफ नजिक पुगेको छ। आइतबार कीर्तिपुरस्थित त्रिवि क्रिकेट रंगशालामा भएको खेलमा कर्णालीले दिएको १५० रनको लक्ष्य काठमाडौँले १८ ओभरमै पाँच विकेट गुमाएर सहज रूपमा पूरा गर्यो।
यो जितसँगै काठमाडौँले प्रतियोगितामा आफ्नो चौथो विजय हात पारेको हो।काठमाडौँ गोर्खाजको प्रदर्शन मिश्रित रहे पनि अन्तिम खेलहरूमा प्रभावशाली दाबेदारी प्रदर्शन गरेको छ।
पहिलो खेलमा जनकपुर बोल्ट्समाथि ५ विकेटले जित,दोस्रो खेलमा सुदूरपश्चिम रोयल्ससँग २९ रनले हार,तेस्रो खेलमा विराटनगर किंग्ससँग ५ विकेटले हार,चौथो खेलमा लुम्बिनी लायन्सविरुद्ध २२ रनले जित, पाँचौँ खेलमा चितवन राइनोजविरुद्ध ५३ रनले जित र आजको जितपछि काठमाडौँ अब प्लेअफ स्थानक नजिक पुगेको छ।
काठमाडौँका लागि गेरहार्ड इरास्मसले सानदार प्रदर्शन गर्दै ४३ अविजित रन बनाए। ६३–३ को अवस्थामा उनले जोन सिम्पसनसँग मिलेर ८६ रनको चौथो विकेट साझेदारी गर्दै टोलीलाई जिततर्फ डोहोर्याए।सिम्पसनले २१ बलमा ४१ रन जोडे।ओपनर बेन चाल्सवर्थले २१ बलमा ३४ रन बनाए।
आकाश त्रिपाठीले ८ रन, मिलिन्द कुमार १५ रन बनाए भने राशिद खान गोल्डेन डकमा आउट भए।कर्णालीका नन्दन यादवले ३ विकेट तथा पवन सर्राफले १ विकेट लिए।
टस जितेर ब्याटिङ रोजेको कर्णाली याक्सले निर्धारित २० ओभरमा सात विकेटको क्षतिमा १४९ रन बनायो।गुल्सनकुमार झाले उत्कृष्ट आक्रामक प्रदर्शन गर्दै २२ बलमा ४९ रन जोडे।८८–६ को अवस्थामा उनले दीपक डुम्रेसँग सातौँ विकेटका लागि ५५ रनको महत्त्वपूर्ण साझेदारी गरे।
काठमाडौँका राशिद खानले ४ ओभरमा ३७ रन खर्चेर २ विकेट लिए।मिलिन्द कुमार र सन्तोष यादवले १–१ विकेट प्राप्त गरे।
यो हारसँगै कर्णालीले प्रतियोगितामा चौथो पराजय बेहोरेको छ, जसले उसको प्लेअफ सम्भावना कठिन बनाएको छ।
