काठमाडौं, १३ मंसिर । त्रिवि क्रिकेट मैदानमा जारी नेपाल प्रिमियर लिग (एनपीएल) मा अनतर्गत आजको पहिलो खेलमा पोखरा एभेन्जर्सले लुम्बिनी लायन्सलाई १५१ रनको लक्ष्य दिएको छ। कीर्तिपुरस्थित त्रिवि क्रिकेट मैदानमा टस हारेर ब्याटिङ थालेको पोखराले २० ओभरमा ५ विकेट गुमाएर १५० रन बनायो।
पोखराका लागि एडम रोसिङटन र जिम्मी निशमले अर्धशतकको पारी खेले। रोसिङटनले ६३ बलमा ७ चौका र ५ छक्कासहित ८१ रन बनाए भने निशमले ३२ बलमा ३ चौका र ३ छक्कासहित ५१ रन जोडे।
ओपनर दिनेश खरेलले ७ रन, किरण ठगुन्ना र तिर्थराज दासले एकएक रन जोडे। कप्तान कुशल भुर्तेल गोल्डेन डकआउट हुन पुगे भने सुमित बर्मा पनि आजको खेलमा डकआउट भए।
लुम्बिनीका लागि शेर मल्ल र तिलक भण्डारीले दुई दुई तथा गुलाबदिन नाइबले एक विकेट लिए। यस्तै अपराह्न साढे ३ बजे शुरु हुने दोस्रो खेलमा साविक विजेता जनकपुर बोल्ट्स र साविक उपविजेता सुदूरपश्चिम रोयल्स खेल्दैछन् ।
