राष्ट्रपति रामचन्द्र पौडेलले मतदाता नामावली ऐन २०७३ लाई संशोधन गर्न बनेको अध्यादेश जारी गरेका छन ।
सरकारको सिफारिशमा राष्ट्रपति पौडेलले आज अध्यादेश जारी गरेका हुन ।
सरकारले आउँदो फागुन २१ गते प्रतिनिधिसभा चुनाव तोकेको छ । चुनाव तोकेपछि मतदाता नामावली सङ्कलन गर्न नमिल्ने व्यवस्था थियो । त्यसैले सरकारले अध्यादेश ल्याएर कानून संशोधन गरेको हो । अब निर्वाचन आयोगलाई चुनावसम्बन्धी प्रक्रिया अघि बढाउँदै मतदाता नामावली पनि सङ्कलन गर्न बाटो खुलेको छ ।
जेन–जी आन्दोलनका कारण संसद् विघटन भएर चुनाव हुन लागेको हो । तर चुनावमा जेन–जी समूहका धेरै मताधिकार प्रयोगबाटै वञ्चित हुन सक्ने अवस्थालाई ख्याल गरेर सरकारले मतदाता नामावली सङ्कलनका लागि बाटो खुला गरिदिएको हो ।
