भारतको पश्चिमी राज्य गुजरातमा सोमबारदेखि परेको अत्यधिक मनसुनी वर्षाका कारण कम्तीमा १८ जनाको मृत्यु भएको छ। राज्य सरकारका अनुसार आँधीबेहरी, चट्याङ, संरचनात्मक पतन र आकस्मिक बाढीका घटनाले जनधनको क्षति पुर्याएको हो।
राज्य सरकारद्वारा मङ्गलबार राति सार्वजनिक गरिएको विवरणमा, वर्षासँग सम्बन्धित घटनामा १८ जनाले ज्यान गुमाएका छन् भने विपद् प्रतिक्रिया टोलीले दर्जनौं नागरिकलाई सुरक्षित स्थानमा स्थानान्तरण गरेको छ, भनिएको छ।
सबैभन्दा बढी प्रभावित क्षेत्रहरू पालिताना र जेसर सहर रहेका छन्, जहाँ पछिल्लो २४ घण्टामा ८६७ मिलिमिटर पानी परेको छ।
राज्य राहत आयुक्त आलोक कुमार पाण्डेका अनुसार बाढी, चट्याङ र कमजोर संरचनाहरूको पतनका कारण मानवीय क्षति भएको हो।
राष्ट्रीय विपद् प्रतिक्रिया बल तथा स्थानीय प्रशासनले तलाउ क्षेत्र, नदी किनारा र डुबानग्रस्त बस्तीहरूबाट मानिसहरूलाई उद्धार गरिरहेको छ।
उद्धार गरिएकामध्ये गढडा क्षेत्रको एक आँपको बगैंचामा फसेका १८ जना खेत मजदुर र सुरेन्द्रनगर जिल्लाका २२ जना बासिन्दा रहेका छन्। सुरेन्द्रनगरमा बगिरहेको नदीको पानी घरभित्र पस्दा स्थानीयवासी आपतमा परेका थिए।
राज्य राहत आयुक्त पाण्डेले भने, स्थितिलाई सम्हाल्न राज्य पूर्ण रूपमा तयारी अवस्थामा छ, र द्रुत राहत तथा उद्धार सुनिश्चित गर्न अन्तर–विभागीय समन्वयलाई सक्रिय पारिएको छ।
भारतमा जुनदेखि सेप्टेम्बरसम्मको मनसुन वर्षाले खेतीका लागि आवश्यक पानी पुर्याउनुका साथै पानीको स्रोतहरू भरिन मद्दत गर्छ। तर, हरेक वर्ष आकस्मिक बाढी, भूस्खलन र चट्याङका कारण देशभरि सयौं मानिसको ज्यान जाने गर्छ।
