काठमाडौं, २६ पुस । आन्तरिक राजस्व विभागले पुस मसान्तभित्र आयकरको पहिलो किस्ताबापतको कर तथा विवरण बुझाउन ताकेता गरेको छ।
विभागले बिहीबार सूचना जारी गरी आर्थिक वर्ष २०८०/८१ को आयकरको पहिलो किस्ताबापतको कर तथा विवरण पुस मसान्तसम्म बुझाउन आग्रह गरेको हो।
विभागले ठूला करदाता कार्यालय, मध्यम करदाता कार्यालय, सम्बन्धित आन्तरिक राजस्व कार्यालय र करदाता सेवा कार्यालयमा करबापतको रकम दाखिला गर्न करदातालाई सूचित गरेको छ।
आयकर ऐन, २०५८ बमोजिम आय वर्ष २०८०/८१ को आयकर किस्ता दाखिला गर्नुपर्ने करदाताले २०८०/८१ को कारोबार अनुमानित करको विवरण र सोहीअनुसार तिर्नुपर्ने आयकरको प्रथम किस्ताबापतको ४० प्रतिशत रकम पुसभित्रै दाखिला गर्न विभागले सूचना जारी गरेको हो।
