काठमाडौं, ८ असाेज । नेपाली प्रविधि कम्पनी सोसयरले सूचना सुरक्षा व्यवस्थापनसम्बन्धी अन्तर्राष्ट्रिय मापदण्ड ‘आईएसओ/आईईसी २७००१:२०२२’ प्रमाणीकरण प्राप्त गरेको छ।
ग्राहक सम्बन्ध व्यवस्थापन (सीआरएम), ओम्नीच्यानल सञ्चार, सामाजिक सञ्जाल व्यवस्थापन, ई-कमर्स, टिकटिङ, कल तथा अटोमेसनलगायतका सेवा प्रदान गर्दै आएको सोसयरले सूचना सुरक्षाका क्षेत्रमा अन्तर्राष्ट्रिय मापदण्डअनुसार प्रणाली कार्यान्वयन गरेको जनाएको छ।
कम्पनीका अनुसार यो प्रमाणीकरणले ग्राहक तथा साझेदारका सूचना र डिजिटल सम्पत्तिको सुरक्षा, अनधिकृत पहुँच एवम् सूचना चुहावटको जोखिम न्यूनीकरण र सुरक्षा घटना व्यवस्थापनका लागि व्यवस्थित प्रणाली स्थापित भएको प्रमाणित गर्छ।
सोसयरका प्रमुख नीरज वैद्यले यो प्रमाणपत्र केवल एक उपलब्धिमा मात्र सीमित नरहेको बताए। “यो हाम्रा ग्राहक र साझेदारहरूले हामीमाथि राख्नुभएको विश्वासप्रतिको जिम्मेवारी हो। हामी सूचना सुरक्षालाई संस्थागत संस्कृति र दैनिक कार्यप्रणालीको अभिन्न अङ्गका रूपमा लिन्छौँ,” उनले भने।
विगत पाँच वर्षदेखि सञ्चालनमा रहेको सोसयरले ‘सोसयर कनेक्ट’, ‘सोसयर कमर्स’ र ‘सोसयर एसएमएस’ मार्फत ग्राहक सेवा, सीआरएम, ई-कमर्स, एसएमएस, रिपोर्टिङ तथा व्यावसायिक कार्य व्यवस्थापनसम्बन्धी सेवा प्रदान गर्दै आएको छ।
आईएसओ प्रमाणीकरणसँगै ग्राहकको सूचना सुरक्षा, जोखिम व्यवस्थापन, व्यावसायिक निरन्तरता तथा नियामकीय पालनाप्रतिको प्रतिबद्धता थप सुदृढ र संस्थागत भएको कम्पनीले जनाएको छ।
