संविधान दिवस यस वर्ष सामान्य रूपमा मनाइने

काठमाडौँ । यस वर्षको संविधान दिवस सामान्य रूपमा मनाइने भएको छ। गृह मन्त्रालयका अनुसार, ‘जेन–जी’ आन्दोलनका कारण उत्पन्न परिस्थितिले उत्सवका रूपमा संविधान दिवस मनाउन असमर्थ रहेकोले यसलाई सामान्य रूपमा मनाउने निर्णय गरिएको हो।

गृहमन्त्री ओमप्रकाश अर्यालले सबै जिल्लाका प्रमुख जिल्ला अधिकारीहरूसँगको भर्चुअल बैठकमा संविधान दिवसको कार्यक्रमलाई सामान्य ढंगले मनाउने निर्देशन दिएका छन्। यसै क्रममा, सरकारले जिल्लासहित सङ्घमा पनि केवल साङ्केतिक रूपमा कार्यक्रम आयोजना गर्ने तयारी गरेको छ।

सैन्यको तर्फबाट पनि संविधान दिवसलाई सामान्य रूपमा मात्र मनाउने निर्णय गरिएको छ।

यस बीच, राष्ट्रपति रामचन्द्र पौडेलले असोज ३ गते दिउँसो साढे ३ बजे शीतल निवासमा संविधानसँग सम्बन्धित एक विशेष कार्यक्रम आयोजना गर्नुभएको छ। उक्त कार्यक्रममा विशिष्ट व्यक्तिहरूलाई आमन्त्रण गरिने भएपनि यो पनि सामान्य ढंगले आयोजना हुने जानकारी प्राप्त भएको छ।

पर्सी, असोज ३ गते संविधान जारी भएको १० वर्ष पूरा हुँदैछ। २०७२ सालको असोज ३ गते नेपालले संविधान जारी गरेको थियो, जसलाई सरकार हरेक वर्ष उत्सवका रूपमा मनाउँदै आएको छ।