काठमाडौं। धनी राष्ट्रहरुकाे संगठन जी–७ मुलुक सन् २०३० को पहिलो ६ महिनामा कोइलालाई चरणबद्ध रूपमा हटाउने प्रतिबद्धता व्यक्त गर्न तयार रहेको स्थानीय सञ्चार माध्यमले रिपोर्ट सार्वजनिक गरेका छन्।
इटालेली सहर टुरिनमा दुई दिने बैठकका लागि भेला भएका जी–७ मन्त्रीहरूले जलवायु, ऊर्जा र वातावरणका विषयमा छलफल गरिरहेका छन्।
सन् २०३० र सन् २०३५ को बीचमा ऊर्जा स्रोतका रूपमा कोइला हटाउने मिति तय गर्नमा ध्यान केन्द्रित गर्दै उनीहरूले मंगलबार आफ्नो प्रतिज्ञालाई अन्तिम रूप दिने अपेक्षा गरिएको इटालेली क्लास सिएनबिसीले रिपोर्ट गरेको छ। बेलायती ऊर्जामन्त्री एन्ड्र्यु बोवीले भने, ‘हामीसँग सन् २०३० को पहिलो ६ महिनामा कोइलालाई चरणबद्ध गर्ने सम्झौता भएको छ।’
जी–७ मा क्यानाडा, अमेरिका, फ्रान्स, जर्मनी, इटाली, बेलायत र जापान समावेश छन्। बैठकमा सामान्यतया युरोपेली संघ (इयु) का शीर्ष अधिकारीहरू उपस्थित हुन्छन्।
क्लाइमेट एनालिटिक्सको हालैको प्रतिवेदनले यीमध्ये कुनै पनि देशले सन् २०३० का लागि आफ्नो विद्यमान उत्सर्जन लक्ष्य पूरा मार्गमा नभएको बताएको छ।
