काठमाडौँ । गृहमन्त्री रमेश लेखकले उपनिर्वाचन केन्द्रीत सुरक्षा प्रवन्ध मजबुद गर्न आवश्यक निर्देशन दिइसकेको बताउनुभएको छ ।
सिंहदरबारमा शुक्रबार बसेको प्रतिनिधिसभा अन्तर्गतको राज्य व्यवस्था तथा सुशासन समिति बैठकमा लेखकले निर्वाचन आयोगसंग समन्वय गरेर सुरक्षाको आवश्यक प्रवन्ध गर्न निर्देशन दिइसकेको बताउनुभएको हो । उहाले निष्पक्ष र भयरहित वातावरणमा उपनिर्वाचन गर्न सरकार तयार रहेको उल्लेख गर्नुभयो ।
उपनिर्वाचन अघि केहि स्थानमा कर्मचारी सरुवा भएको बिषयमा संघीय मामिला मन्त्रीसंग कुरा भइरहेको उहाले बताउनुभयो । अख्तियार दुरुपयोग अनुसन्धान आयोग ऐन,२०४८ लाई संशोधन गर्न बनेको विधेयकका सम्वन्धमा भएको छलफलका क्रममा मन्त्री लेखकले कानुन निर्माणका विधेयक दर्तादेखि पास गर्नेसम्मका सबै चरणहरूलाई समय तोकेर अगाडी बढाउनुपर्ने बताउनुभयो ।
बैठकमा सांसदहरुले अख्तियारलाई निष्पक्ष रुपमा अघि बढाउनका लागि विधेयकमा आवश्यक परिमार्जन गरि अघि बढाउनुपर्नेमा जोड दिएका थिए । सांसद विश्वप्रकाश शर्माले अख्तियारका प्रमुख आयुक्त र आयुक्तहरु खुल्ला प्रतिष्पर्धाबाट जान सक्ने विधि अवलम्वन गर्नुपर्ने बताउनुभयो ।
त्यस्तै उहाले भ्रष्टाचार विधेयकमाथि समितिमा छलफल भइरहदा राज्यमन्त्रीको कम्पनी कालोसूचीमा परेको र उपनिर्वाचन हुने तहमा कर्मचारी सरुवा लगाएतका प्रकरण देखिएको भन्दै स्पष्ट पार्नुपर्ने धारणा राख्नुभयो ।
त्यस्तै सांसद रघुजी पन्तले विधेयकमा आएका संशोधनलाई समावेश गर्न नसके सरकारले नै विधेयक परिमार्जन वा अन्य उचित प्रवन्धन गरेर समेट्न सक्ने गरि अघि बढ्नुपर्ने धारणा राख्नुभयो ।
बैठकमा कांग्रेस सांसद विश्वप्रकाश शर्माले उठाएका बिषयमा ऊर्जा राज्यमन्त्री पूर्ण बहादुर तामाङले आफु जनताको प्रतिनिधि भएसंगै आफ्नो काम र जिम्मेवारी अरुलाई हस्तान्तरण गरेको बताउनुभयो । अहिलेको अवस्थामा आफु कानूनबमोजिम कसुरदेखिए राजनीतिबाट बाहिर निस्कने उहाको भनाइ छ ।
यसैबीच समितिले अख्तियार दुरुपयोग अनुसन्धान आयोग ऐन २०४८ लाई संशोधन गर्न बनेको विधेयकमा सहमति हुन नसकेका बिषयहरुमा समाधान खोज्ने र सुझावहरुलाई समेट्ने जिम्मेवारी उपसमितिलाई दिएको छ ।
