आज पौषे औँसी, तीर्थमा श्राद्ध गर्ने दिन

काठमाडौँ – पौष कृष्ण अमावश्या (औँसी) अर्थात् पौषे औँसी। तीर्थमा श्राद्ध गर्ने दिनको रूपमा यसको महत्त्व छ।

यो तिथिमा विभिन्न तीर्थस्थलमा पुगेर पितृलाई तर्पण, श्राद्ध गर्ने परम्परा छ। काठमाडौंको गोकर्ण, उत्तरगया र रसुवाको वेत्रावतीलगायत तीर्थस्थलमा श्राद्ध गर्नेको घुइँचो लाग्छ।

पुराणहरूमा वर्षा र हिउँदका औँसीमा तीर्थमा पुगेर श्राद्ध गर्ने विधान बताइएको छ।

भदौ र पुसको औँसी तिथिमा गोकर्णेश्वर महादेव नजिकै पिण्ड दिए पितृहरूको उद्धार हुने नेपाल माहत्म्यमा उल्लेख छ।

यी औँसीमा तीर्थमा श्राद्ध गर्नाले पितृकुल, मातृकुल र बन्धुकुलका पितृको उद्धार हुने शास्त्रमा उल्लेख भएको धर्मशास्त्री प्राडा रामचन्द्र गौतम बताउँछन्।

पञ्चाङ्गमा शुक्रबार ५९ ५४ अर्थात् भोलिपल्ट बिहान सूर्योदयको आसपाससम्म औँसी तिथि रहेको उल्लेख छ।