काठमाडौं, १ चैत । अख्तियार दुरुपयोग अनुसन्धान आयोगले खानेपानी योजनामा भ्रष्टाचार गरेको आरोपमा हुम्लाको चङ्खेली गाउँपालिकाका तत्कालीन अध्यक्षसहित नौ जनाविरुद्ध भ्रष्टाचार मुद्दा दायर गरेको छ ।
वडा नम्बर ३ को ब्याफु खानेपानी मर्मत योजनाका नाममा पाँच लाख १५ हजार एक सय आठ रुपैयाँ दुरुपयोग गरेको आरोपमा गाउँपालिका अध्यक्ष धनलाल चौलागाईँ, प्रमुख प्रशासकीय अधिकृत विष्णुबहादुर शाही, वडाध्यक्ष शालिग्राम ऐडीसहित नौ जनाविरुद्ध अख्तियारले विशेष अदालतमा भ्रष्टाचार मुद्दा दायर गरेको अख्तियारले जनाएको छ ।
खानेपानी योजना मर्मतको काम नभए पनि काम भएको भनी कार्य सम्पन्न प्रतिवेदन बनाएको, झुटा बिल भरपाई तयार गरेको आदि कारणले सरकारलाई हानी/नोक्सानी पुर्याएको अख्तियारको दाबी छ ।
