असोज २०, बारा । बाराको अमलेखगञ्जमा रहेको तीन नम्बर पुल नजिक बस दुर्घटना हुँदा अहिलेसम्म १५ जनाको मृत्यु भएकाे छ भने २० जनाभन्दा धेरै गम्भीर घाइते भएका छन् ।
बस दुर्घटनामा गम्भीर घाइते भएकाहरूलाई हेटौँडाका अस्पताल पुर्याएपछि डाक्टरहरूले मृत घोषणा गरेका थिए । दुर्घटनामा ठूलो चोटपटक लागेकाहरूलाई उपचार गर्न हेटौँडाका निजी र सरकारी अस्पतालमा ल्याएपछि १५ जनालाई डाक्टरले मृत्यु भएको घोषणा गरेका जिल्ला प्रहरी कार्यालय मकवानपुरका प्रहरी उपरीक्षक एसपी वामदेव गौतमले बताउनुभयो ।
ज्यान गुमाउनेमा नौ जना पुरुष र ६ जना महिला रहेका छन् ।
हेटौँडा अस्पतालमा मात्रै १२ जनाको ज्यान गएको हो । चुरेहिल अस्पताल र मकवानपुर सहकारी अस्पतालमा तीन जनाको ज्यान गएको जिल्ला प्रहरी कार्यालय मकवानपुरका एसपी गौतमले जानकारी दिनुभयो । उनीहरूको सनाखत हुन बाँकी छ ।
दुर्घटनाका घाइतेहरूको चुरेहिल, हेटौँडा र सन्चो अस्पतालमा उपचार भइरहेको छ । केही घाइतेलाई भरतपुर अस्पताल रिफर गरिएको प्रहरीले जनाएको छ ।
दुर्घटनाको प्रकृति हेर्दा मृतकको सङ्ख्या अझै बढ्न सक्ने प्हरीले जनाएकाे छ ।
नारायणगढबाट पथलैया जाँदै गरेको बा प्र.०६–००१ ख ०१० नम्बरको बस दुर्घटनामा परेको हो । बसमा ५१ जना यात्रु रहेका प्रहरीले बताएको छ । जितपुरसिमरा उपमहानगरपालिका २२ मा दुर्घटना भएको हो ।
