प्रविधि क्षेत्रमा आर्टिफिसियल इन्टेलीजेन्स (एआई)को दौड चलिरहेका बेला सामसङले ‘ग्यालेक्सी एआई’को घोषणा गरेको छ । कम्पनीले नयाँ पुस्ताको ग्यालेक्सी एस२४ सिरिज सार्वजनिक गर्नुअघि ग्यालेक्सी एआईको घोषणा गरेको हो ।
सामसङले सन् २०२४ मा एस२४ सिरिजका फोन ल्याउने अपेक्षा गरिएको छ । कम्पनीले ग्यालेक्सी एआई पनि आउँदो वर्षको सुरुमा सार्वजनिक हुने जनाएको छ । यो सुविधा सामसङका डिभाइस र त्यस्तै अरूमा पनि उपलब्ध हुने बताइएको छ ।
ग्यालेक्सी एआईले ‘फोन कल’लाई लाइभ अनुवाद गर्न सक्ने जनाइएको छ ।
एआई लाइभ ट्रान्सलेट कलले प्रयोगकर्तालाई चाहिएका बेला ‘पर्सनल ट्रान्सलेटर’का रूपमा काम गर्नेछ ।
ग्यालेक्सी डिभाइसकै फोनकलसँग एकीकृत गरिएकाले यस्तो सुविधाका निम्ति तेस्रो पक्षको एप चलाइरहन नपर्ने कम्पनीले जनाएको छ ।
यो एआई सुविधाले अडियो र टेक्स्टलाई बोलेलेखेकै बेला लाइभ अनुवाद गर्न सक्नेछ ।
यसबाहेक विभिन्न अत्याधुनिक सुविधाका साथ सार्वजनिक गरिने ग्यालेक्सी एआईसँगै मोबाइल एआईको नयाँ युग सुरु हुने विश्वास सामसङको छ ।
