काठमाडौं । नेकपा एमालेका अध्यक्ष केपी शर्मा ओलीले गत भदौ २४ गते भएको विध्वंसले देश कम्तीमा २५ वर्षभन्दा धेरै पछाडि परेको बताएका छन् ।
बालकोटस्थित जलाइएको आफ्नो घरमा पुगेका ओलीले सञ्चारकर्मीसँग कुरा गर्दै भदौ २४ गते देशका लागि कालो दिन भएको बताए ।
‘देश २५ वर्षभन्दा धेरै पछि परेको छ, अहिले रमाउनेहरू कम्तीमा २५ वर्षभन्दा पछाडि परेका छन् । त्यो कुरा पछि भोग्दै जाँदा थाहा पाउँछन्, अहिले रमाउनेहरूले पनि,’ ओलीले भने ।
यसैबीच, ओलीले गृहमन्त्री सुधन गुरुङले पुराना दलका नेताहरूलाई सुध्रिन दिएको चेतावनीप्रति व्यंग्य गरेका छन् ।
गृहमन्त्री गुरुङले ‘पहिले हेलिकप्टर चढेर भागेका थियौँ, अहिले त्यो पनि हाम्रै हातमा छ । चढिहाल्यौँ भने पनि जाक्दिन्छौँ’ भन्ने अभिव्यक्ति दिएको प्रसंग उल्लेख गर्दै ओलीले त्यस्ता अभिव्यक्तिको आलोचना गरे ।
‘त्यही होइन र भन्या ?’ भन्दै ओलीले व्यंग्य गर्दै भने, ‘यस्ता केटाकेटीहरू धेरै आए, धेरै गए ।’
